آی یازیق وطن !
بو مملکت ده اوز دیلیمیزدن باشقا بوتون دیللر دانیشیلیر !!
ناهید ممدلی
آخی یازیق وطن، نه گونه قالمیسان ؟! او قده ر " آوروپا لاشماق، موعاصیر لشمک لازیمدیر " دئمیشیک کی، ایندی اوزوموزدن هئچ نه قالماییب. شهریمیزده تیکیلن گویده لرین سایه سینده باکیدا باکیلیق قالماییب. چوخ مرتبه لی بینالار، سایسیز حساب سیز شادلیق سارای لاری،باغ ائولری، بیر سوزله دئسک لازیم سیز نه وارسا هر شئی تیکیلیر. مکتب، کیتابخانا، تاریخی موزه لردن باشقا...
موزه لردن سوز دوشموشکن هله ایندیه دک بیزیم قاراباغ فاجیعه سینی اوزونده عکس ائتدیرن بو تاریخی فاجیعه بارده اینسانلار، شهریمیزه گلن قوناقلاری معلوماتلاندیران بیر موز ه ین آدینی چکه بیلر سینیزمی؟ من چکه بیلمیرم.
توتاق کی، بو بارده آز - چوخ بیلیریک. بس دیگر اولکه لردن گلن وطنداشلار نئجه؟ اونلار قوناق اولدوقلاری اولکه نین هانسی فاجیعه لردن کئچدیینی بیلیرمی؟ البته یوخ، چونکو بیز فیل قولاقیندا یاتمیشیق، آنجاق ائرمنیلر بیزیم یاشادیغیمیز فاجیعه نی، آبیده لریمیزی، مدنیتیمیزی اوز آدلارینا کئچیریب بوتون دونیایا ثبوت ائتدیریبلر.
بس بیز نیه بونو ائده بیلمیریک ؟ من جاوابینی وئریم، چونکو، بیزیم ایش آداملاریمیز اوز تیجارت لرینی قوروماقلا، یعنی شادلیق سارایی، گویده لرینی قوروماقلا، ماشین آل وئری ائتمک له مشغول دورلار. باش بیلن لریمیز ایسه اوتوروب نه ایسه گوزله ییر و بیزی ده صبر دعوت ائدیرلر.
بیز ده صبر ائدیریک. آرتیق ۱۵ ایلدیر. بلی، چوخ گولونج اولسادا ۱۵ ایل... آنجاق تکجه یوخاریداکی لاری گوناهلاندیرماق اولماز، چونکو بیزدن ده چوخ شئی آسلی دیر. اگر بیز ایسته سیدیک، بیر اولسایدیق، هئچ ندن هئچ کیمدن قورخماسایدیق بیزه هئچ نه ائده بیلمزدیلر. بلکه بیز اوزوموزده ساکیت حیاتا آلیشمیشیق. تکجه جانیم ساغ اولسون دئییریک. آخی نیه اوزوموزو ایشه سالاق، ائویمیزی ساکیت حیاتیمیزی ایتیرک، گئدک اورادا چوللره دوشک؟ بلی بئله فیکیرلشن لر آز دئییل. بونون عکسینی فیکیرلشن لر ده چوخدور. بونو بیلیرم و بونا اینانیرام. بیلیرم کی ، هر گون آللاها دوعا ائدیب تورپاقلارینین قاییتماسینی آرزو ائدیب، او تورپاغا بیر ده آیاق باسیب اوردا اولمک ایسته ینلر ده چوخدور. من او تورپاقلاردان بیرینده ۶ ایلیمی کئچیرسمده، من او تورپاغیمی گورمک آرزوسو ایله یاشاییرام. بونو آرزو ائده ک و کئچک یازیق وطنیمیزین یازیق لیغینی ثبوت ائدن دیگر مسئله یه. نئجه کی، همیشه اوستدن کئچیریک.
کئچک بیزیم باشقا ایتیردیییمیزه کی، بو دا حورمت حیسسی دیر. دیله حورمت، دینه، بایراقا، بویویه حورمت. موستقیل لیک قازاناندان بری بو یازیق وطنمیزین دوولت دیلی آذربایجان دیلی دیر. لاکین دئیه سن بونو هامی بیلمیر. چونکو بیزیم آذربایجان رئسپوبلیکاسی نین وطنداشلاری آدلاندیردیغیمیز اینسانلارین بیر چوخو، خصوصا" ده باکی شهرینده یاشایانلار آذربایجان دیلیندن باشقا بوتون دیللرده دانیشیر. روس دیلینی اوزلرینه عزیز دیل سئچیب لر. حتی بو دیلده بیلمه ینلری " گئری قالمیش" آدلاندیرییرلار. من دئمیرم کی، روس دیلینی و یاخود اینگیلیس دیلینی بیلمه یین، اصلا ! عکسینه نه قده ر خاریجی دیل بیلسن، او قده ر بیلیین ده، ساوادین دا زنگین اولار. ساده جه بو دیللردن لازیم اولاندا ایستیفاده ائدک و دوغما دیلیمیزی بیلک و اونا حورمت ائدک. حورمت ائدیلمه ینلردن بیری ده دیندیر. اینسانلار اونودورلارکی، اونلار موسلمان دوولتینده یاشاییرلار. اونلار دینه عایید بیر چوخ شئی لری بیلمیرلر. مثلا" سوروشساق ۱۰ نفردن اوچو کلمه یه شهادت بیلر یا بیلمز. منیم فیکریمجه اینسانلاریمیز چوخو دینله ماراقلانسا هر شئیه موناسیبت لری دئیشر، بیر - بیر لرینه حورمت ائتمه یی اویرئه نر، اوزلرینده مسئولیت حیس ائدر لر. گلین اونوتمایاق کی، بیزیم دینیمیز ایسلام دینیدیر.
ایندی بایراقیمیزدان دانیشاق، بیر چوخونوز دئیه جک سینیز کی، بایراغین نئییندن دانیشاق. بیلدییمیز او رنگلی بایراق دیر دا...
لاکین بیز بایراقا یئتیرینجه دیققت یئتیریریک می؟ قارداش تورکیه لی لره نظر سالساق بونا جاواب تاپاریق. اونلار بوتون مراسیملرینده تویلاریندا، یاسلاریندا، تدبیرلرینده بایراقلاری باشلارینین اوزرینده دورور. اونلار هارا گئتسه لر بیرینجی بایراقلاری اونده گئدیر. بیزده ده بئله دیر می؟ هانسی میزین ائوینده بایراق وار؟ ال له سایی لاسی قده ر آز. آنجاق تورکیه نین ان اوجقار کندلرینده کی ائوده بئله تورک بایراغینی گورمک اولار. بونو اوچون منده اونلارا حورمت ائدیرم. اومید ائدک کی، بو یازیق وطنین، بوتون یازیق وطنداشلاری نیه یازیق اولدوغونو نه واختسا آنلایار و یازیق وطنی بخته ور وطن ائتمه یه اوزونده گوج تاپار. لاکین من بو وطنی قاراباغ سیز و بیزدن آلینمیش دیگر تورپاقلارسیز، عادت - عنعنه سیز، دیلیمیزه، دینیمیزه، بایراغیمیزا و ان نهایت اوزوموزه حورمت سیز بخته ور گورمورم.
لاتينجه دن کؤچورمه.
http://www.yenicag.az/modules/news/article.php?storyid=161
